မိုးကောင်းကင် အောက်သို့ ရောက်လာကြသူအားလုံး ကျန်းမာချမ်းသာစွာဖြင့် ရွှင်လန်းချမ်းမြေ့ကြပါစေကြောင်း ဆုမွန်ကောင်းတောင်း မေတ္တာပို့သလိုက်ပါတယ်။

Thursday, September 29, 2011

မိကျောင်းမင်း ရေကင်းပြခြင်း

6658795.jpg

မှားယွင်းမှုဟူသည် မောဟမကင်းသူလူတိုင်းနှင့်ဆက်ဆံ၏။

သူတစ်ပါးမှားလျှင် အမှန်ရောက်အောင် ငါပြင်မည်။

ငါမှားလျှင် သူတစ်ပါးအပြင်ကို ငါခံမည်။

ငါ့ကိုပြုပြင်သူကို ငါ့ဆရာဟု အမှတ်ပြုမည်။

သူတစ်ပါးအကျိုးကို ငါလိုလားမှ

ငါ့အကျိုးကို သူတစ်ပါးက လိုလားမည်။

ငါ့တာဝန်ကို ငါကိုယ်တိုင်သိ၍ ဆောင်ရွက်မည်။

ငါ့အလိုသို့သာ တစ်ဖက်သတ်လိုက်သူမှာ

ငါ့မိတ်ဆွေမဟုတ်

သုခ၏ မျိုးစေ့ဖြစ်သောဒုက္ခကို

ရဲဝံ့စွာ ငါခံယူမည်။

ဒုက္ခ၏ မျိုးစေ့ဖြစ်သော သုခကို

ရဲဝံ့စွာ ငါရှောင်ရှားမည်။

ငါ့အလုပ်နှင့်တူသော အကျိုးကို

မချွတ်ငါရမည်။

(အဘိဓဇမဟာရဋ္ဌဂုရု ညောင်တုန်းမြို့၊ ရွှေဟင်္သာတောရ၊ စတုတ္ထစံကျောင်းဆရာတော်ဘုရားကြီး ဘဒ္ဒန္တဝိမလ)

“မိကျောင်းမင်း ရေကင်းပြ၊ ဘုန်းကြီးစာချ”

ဟူသော စကားပုံတို့က

ဆရာကသာတပည့်ကို ဆုံးမရမည်။

တပည့်ဖြစ်သူက ဆရာအား

မဆုံးမရဟု ပြနေသည်။

ထိုစကားပုံတို့သည်

မသိမှုအဝိဇ္ဇာကို အကုန်အစင်ပယ်ပြီးသော

ရဟန္တာ တို့အတွက်သာ ဖြစ်နိုင်သည်။

အဝိဇ္ဇာမပယ်ရသေးသော

ပုထုဇဉ်တို့အတွက်ကား မဖြစ်နိုင်ချေ။

အဘယ်ကြောင့်နည်း။

မောဟ မကင်းသေးသူမှန်သမျှ

အမှားနှင့် မကင်းသေးသောကြောင့်ပါတည်း။

သီဟိုဠ်ကျွန်း၊ တလင်္ဂရအရပ်၌ သီတင်းသုံးနေထိုင်တော်မူသော ဓမ္မဒိန္န အမည်ရှိ ရဟန္တာမထေရ်မြတ်ကြီးသည် ဥစ္စဝါလိကအရပ်၌ သီတင်းသုံး နေထိုင်တော်မူသည့် ကမ္မဋ္ဌာနစရိယဆရာဖြစ်တော်မူသော မဟာနဂမထေရ်ကြီးကို အဘယ်ကဲ့သို့ဆုံးမရမည်ကို စဉ်းစား၍ မရအောင် ရှိနေတော် မူရှာလေသည်။

အစဉ်းစားရကြပ်မည်ဆိုလျှင်လည်း ကြပ်စရာပါပေ။ အဘယ်ကြောင့် ဆိုသော် မဟာနာဂမထေရ်ကြီး၏ နည်းပေးလမ်းပြမှုဖြင့် ဓမ္မဒိန္နမထေရ် နှင့်တကွ တပည့်ပေါင်း သုံးသောင်းကျော်တို့သည် ကိလေသာအာသဝေါကုန်ခန်း ရဟန္တာ ဖြစ်တော်မူကြရသည်။ သို့သော် မိမိတို့ကိုယ်တိုင် ရဟန္တာဖြစ်ပြီး၍ ဆရာဖြစ်သူ၏ စိတ်ကို မိမိတို့စိတ်ဖြင့် ပိုင်းခြားဝေဖန်၍ ကြည့်လိုက်သောအခါ ထူးပေဆန်းပေစွ။ အံ့သြစရာကောင်းပေစွ။

ဆရာဖြစ်သူ မဟာနာဂမထေရ်ကြီးကား တစ်ထောင့်ငါးရာ ကိလေသာကို တစ်ပါးမှ မသတ်ရသေးသော ပုထုဇဉ်ဘဝသာ ရှိသေးသည်ကို တွေ့ကြရသောကြောင့်ပေတည်း။ ဝါတော် ၆၀-ကျော်၊ သက်တော် ၈၀-ကျော်၊ မထေရ်ကြီးလည်းဖြစ်ပြန်၊ မိမိတို့ရဟန္တာဖြစ်ရန် တရားပြပေးသော ဆရာလည်းဖြစ်ပြန် ဤအကြောင်းကြီးနှစ်ချက်ကြောင့် မည်သည့်တပည့်ကမျှ အသိပေး လျှောက်ထားရဲခြင်း မရှိကြပါချ။

ကိလေသာကင်းကွာခြင်းသည် လျှပ်စစ်လက်သကဲ့သို့ တဒင်္ဂကင်းကွာခြင်း၊ မှော်တောထဲခဲပစ်လိုက်သကဲ့သို့ ဝိက္ခမ္ဘန= အနည်းငယ်ကြာအောင် ကင်းကွာခြင်း၊ မိုးကြိုပစ်ချသကဲ့သို့ နောင်သံသရာ တစ်လျှောက် ဘယ်တော့မှ ထပ်မဖြစ်တော့အောင် သမုစ္ဆေဒ= အမြစ်ပြတ်ကင်းကွာခြင်းဟု သုံးမျိုးရှိရာ အဘိညာဉ်သမာပတ်အရာ အမြဲဝင်စားနိုင်လောက်အောင် နိုင်နင်းတော်မူသော မဟာနာဂမထေရ်ကြီး၏သန္တာန်၌ အဘိညာဉ်၏ တန်ခိုးဖြင့် နှစ်ပေါင်း ၆၀-ကျော်ကြာအောင် ကိလေသာများ ဝိက္ခမ္ဘနပဟာန်အားဖြင့် ကင်းကွာနေရာ အရဟတ္တမဂ်ရရှိပြီး ရဟန္တာဖြစ်၍ ကင်းကွာနေတာဟု ထင်လျှင်လည်း ထင်စရာပါပေ။ အကယ်၍ ဆရာဟူသောဂုဏ်ကြောင့် မည်သည့်တပည့်ကမှ အသိပေးဆုံးမခြင်းမရှိခဲ့လျှင် ရဟန္တာတပည့်သုံးသောင်းကျော်ကို မွေားဖွားပေးခဲ့သော မဟာနာဂမထေရ်ကြီးကား ပုထုဇဉ်အဖြစ်နှင့်သာ ပျံတော်မူရပေတော့မည်။

ထိုအဖြစ်ကို မြင်တော်မူရက်ရှာသော ဓမ္မဒိန္နမထေရ်မြတ်ကြီးသည် မဖြစ်ဖြစ်သည့်နည်းဖြင့် အသိပေး ဆုံးမတော်မူမည်ဟူသော စေတနာဖြင့် မဟာနာဂမထေရ်ကြီး သီတင်းသုံးရာ ဥစ္စဝါလိကအရပ်သို့ ကြွရောက်တော် မူခဲ့လေသည်။ ဓမ္မဒိန္နမထေရ်ကိုမြင်လျှင် မဟာနဂမထေရ်ကြီးက..

“ငါ့ရှင် ဓမ္မဒိန္န အခါမဟုတ်ဘဲ အဘယ်သို့သော အကြောင်းထူးကြောင့် လာခဲ့ပါသလဲ”

“မှန်ပါ့ အရှင်ဘုရားထံတွင် ပြဿနာလေးများ မေးလျှောက်ရန် အတွက် လာခဲ့ခြင်းဖြစ်ပါသည်ဘုရား”

“ငါ့ရှင် ဓမ္မဒိန္န မေးပါ။ သိလျှင်လည်း ဖြေပါ့မယ်”

သို့နှင့် လောကုတ္တရာရေးနှင့်ပတ်သက်ဆက်စပ်သော ပြဿနာပေါင်း တစ်ထောင်ကိုမေးမြန်းရာ လွယ်လင့်တကူပင် ဆုတ်ဆိုင်းခြင်းမရှိ၊ ဖြေတော်မူ နိုင်သည်။ ထိုအခါ ဓမ္မဒိန္နမထေရ်မြတ်က…

“အရှင်ဘုရားရဲ့ ဉာဏ်တော်ဟာ ထက်မြက်စူးရှတော်မူလှပါတယ်။ အရှင်ဘုရား ဒီတရားထူးကို ဘယ်အချိန်ကာလလောက်က ရရှိခဲ့ပါသလဲဘုရား”

“လွန်ခဲ့သော အနှစ်ခြောက်ဆယ်လောက်က ရခဲ့ပါတယ်”

“အရှင်ဘုရား သမာဓိတန်ခိုး(အဘိညာဉ်တန်ခိုး) အသုံးပြုပါသေးသလားဘုရား”

“ငါ့ရှင် သမာဓိအသုံးပြုခြင်းသည် မခဲယဉ်းပါ”

“ဤသို့ဆိုလျှင် တပည့်တော်ကို ဆင်တစ်ကောင် ဖန်ဆင်းပြပါဘုရား”

ထိုအခါ မဟာနာဂမထေရ်ကြီးက အစွယ်ကြီးတကားကားနှင့် ကြီးများထွားကြိုင်းလှသော ဆင်ဖြူတော်ကြီးတစ်ကောင်ကို ဖန်ဆင်းပြလိုက်သည်။

“အရှင်ဘုရား။ အဲဒီဆင်ကြီးဟာ နားရွက်ကုပ်၊ အမြီးထောင်ကာ နှာမောင်းကို ခံတွင်းထဲထည့်ပြီး ကြောက်မက်ဖွယ် အသံပေးလျာက် အရှင် ဘုရားထံ တည့်တည့်ပြေးလာဟန် ဖန်ဆင်းပြတော်မူပါဦးဘုရား”

ဓမ္မဒိန္နမထေရ်၏ စကားအဆုံးမှာပင် မဟာနဂမထေရ်ကြီးက ဖန်ဆင်းပြတော်မူလိုက်ရာ အဘိညာဉ်တန်ခိုးဖြင့် ဖန်ဆင်းထားသော ဆင်သည် တကယ့်မုန်ယိုနေသည့် ဆင်တစ်ကောင်ကဲ့သို့ ပြေးလာရာ ပုထုဇဉ်မျှသာရှိသေးသော မဟာနာဂမထေရ်ကြီးသည် မိမိဖန်ဆင်းသော ဆင်ကိုပင် ကြောက်လန့်ရှာလွန်းသဖြင့် ထပြေးရန် ဟန်ပြင်လိုက်ရာ ထိုအချက်ကို သတိထားနေသော ဓမ္မဒိန္နမထေရ်မြတ်က မဟာနာဂမထေရ်ကြီး၏ သင်္ကန်းစကို လှမ်းဆွဲပြီး မေးလျှောက်လိုက်သည်မှာ…

“အရှင်ဘုရား… ရဟန္တာများမှာ ကြောက်ရွံ့ထိတ်လန့်ခြင်း ရှိပါသေးသလားဘုရား”

ထိုအခါကျမှ မဟာနာဂမထေရ်ကြီးမှာ မိမိ၏ ပုထုဇဉ်အဖြစ်ကို သိရှာတော်မူသဖြင့် တပည့်ဖြစ်သူ ဓမ္မဒိန္နမထေရ်ရှေ့တွင် လက်အုပ်ချီဆောင့်ကြောင့်ထိုင်လျက်…

“ကျေးဇူးကြီးလှပါသည် ငါ့ရှင်ဓမ္မဒိန္န။ ငါ့ရှင် ဝံ့ဝံ့စားစား လာရောက် ဆုံးမသောကြောင့်သာလျှင် တပည့်တော်သည် မိမိ၏ ပုထုဇဉ်အဖြစ်ကို သိရပါသည်။ တပည့်တော်အား ကိလေသာကို အမြစ်ဖြတ် ပယ်သတ်ပေးနိုင်မည့် ကမ္မဋ္ဌာန်းနည်းလမ်းကို ပေးသနားတော်မူပါ” ဟု ကမ္မဋ္ဌာန်းတောင်းရာ ဓမ္မဒိန္နမထေရ်မြတ်ကလည်း ပေးသနားတော်မူသဖြင့် ကမ္မဋ္ဌာန်းကိုသင်ယူပြီး စကြံင်္သွားရင်းအားထုတ်ရာ ခြေသုံးလှမ်းအရမှာပင် ရဟန္တာဖြစ်တော်မူခဲ့ရပါသည်။ ဤသည်လည်း အောင်မြင်သော ဆုံးမခြင်းပေတည်……။

မေတ္တာရှင် (ရွှေပြည်သာ)ဖဖောင်းတိုင်တစ်တိုင်၏အလင်းရောင် နှင့် ဒဿနရသဝတ္ထုတိုများ စာအုပ်မှ ကောက်နှုတ်ရေးသား ဖော်ပြသည်။

ခင်မင်စွာဖြင့်…

ဇော်သိင်္ခ

Friday, September 23, 2011

ဧရာဝတီဆိုသည်မှာ...

ကျွန်တော်တို့ ရွာကလေးသည် ဧရာဝတီမြစ်၏ အလယ်တွင် ဖြစ်ပေါ်ထွန်းနေသော ရှည်လျားသော မြစ်ရိုးတစ်လျောက်အတိုင်း တည်ရှိနေသော ကျွန်းကြီးပေါ်တွင် နေထိုင်ကြသော ရွာများထဲမှ ကျေးရွာ တစ်ရွာပင် ဖြစ်ပါသည်။ ကျွန်တော်တို့ရွာ၏ အရှေ့ဘက်ကို ကြည့်လျှင် ဧရာဝတီမြစ်ကြီးကို တွေ့ရမည်ဖြစ်သကဲ့သို့၊ အနောက်ဘက်ကို ထွက်ကြည့်လိုက်လျှင်လည်း ဧရာဝတီမြစ်ကြီးပဲ တွေ့ရမည် ဖြစ်ပါသည်။ ကျွန်တော်သည်လည်း ဧရာဝတီ မြစ်ရေလျှံနေစဉ် အိမ်အောက်တွင် မြစ်ရေများဖြင့် ပြည့်နေသော အိမ်ပေါ်တွင် မွေးဖွားခဲ့သူ ဖြစ်ပါသည်။ ထို့ကြောင့် ဧရာဝတီက မွေးဖွားလိုက်သော သားဟူ၍ ပင် ပြော၍ရပါသည်။ ကျွန်တော်တို့ ဘိုးဘွား၊ ဘီဘင်၊ လက်ထက်ကပင် ဒီ ဧရာဝတီမြစ် လယ်ခေါင်ရှိ ကျွန်းပေါ်တွင် နေထိုင်၊ လုပ်ကိုင်စားသောက်လာခဲ့ကြပါသည်။ ကျွန်တော် တို့ ရွာနှင့်တကွ ထိုကျွန်းကြီးပေါ်တွင် နေထိုင်ကြသော ကျေးရွာပေါင်း မြောက်များစွာတို့သည်လည်း မိခင် ဧရာဝတီမြစ်ကြီးကို အမှီပြု၍ လုပ်ကိုင်စားသောက်နေကြရသည်မှာ နှစ်ပေါင်း မည်မျှအထိ ကြားညောင်းခဲ့သည်မှာ ပြော၍ပင် မရနိုင်အောင် ရှိလှပါသည်။ ကျွန်တော်တို့ ငယ်စဉ်ကဆိုလျှင် ဧရာဝတီမြစ်ကြီးသည် ရေစီးရေလာ အရမ်းကောင်းမွန်ပြီး၊ နွေရာသီပင်ဖြစ်နေပါစေ… ဧရာဝတီမြစ်ရေတို့ သည် ကျေးရွာများနှင့် မနီးမဝေးတွင်ပဲ တည်ရှိပြီး ထိုမြစ်ရေများကိုပဲ စဉ်ဆက်မပြက် အသုံးပြု ကြရပါသည်။ စိုက်ပျိုးရေး အတွက် ဆိုလျှင် ထိုကျွန်းများပေါ်တွင် စိုက်ပျိုးထားသော သီးနှံများမှာလည်း ဧရာဝတီ မြစ်ရေတက်စဉ် တွင် မြစ်အတွင်း ရေစီးနှင့် အတူ မျောပါလာသော နှုန်းမြေများသည် ကျွန်တော်တို့ ကျေးရွာများကို ဖြတ်သန်းစီးဆင်းပြီး လျှင် အနိမ့်ပိုင်းကျသော မြေနေရာများတွင် ခိုအောင်းကျန်ရစ်ပါသည်။ ဒါ့အပြင် ကုန်းပြင်မြင့်တွင်လည်း အနည်းငယ်စီ မျောပါသောင်တင်နေရစ်ရပါသည်။ ထိုဒေသရှိ ကျေးရွာများ အားလုံးသည် ထိုသို့ ဧရာဝတီ မြစ်ရေနှင့်အတူ မျောပါလာသော နုန်းမြေများကို အမှီပြု၍ စိုက်ပျိုးရေး လုပ်ငန်းများကို လုပ်ကိုင် စားသောက် နေထိုင်လာခဲ့သည်မှာ လည်း နှစ်ပေါင်းကြာမြင့်စွာ ရှိနေပါသည်။ ဧရာဝတီ မြစ်ရေသည် မြစ်ကြောင်းအပြောင်းအလဲ ကြောင့် တစ်ခါတရံတွင် တစ်ချို့သော ကျွန်းများကို ရေတိုက်စား ကမ်းပါးပြိုမှုများ ဖြစ်ပေါ်လေ့ ရှိပါသည်။ ထိုသို့ ကမ်းပါးပြို တိုက်စားလိုက်သော မြေများသည် မြစ်အောက်ပိုင်းတွင် မြေနုများ အဖြစ် ပြန်လည် ပေါ်ထွန်းလာလေ့ ရှိသည့် အတွက် ထိုမြေနုများပေါ်ထွန်းရာ နေရာသည် ထိုဒေသရှိ ကျေးများ၏ ပိုင်နက်အသီးသီးတွင် ပေါ်ထွန်းလာပြီး ထိုသို့ မြေနုပေါ်ထွန်းလာသော မြေများကို မိမိတို့ ကျေးရွာ ပိုင်နက် အတွင်းတည်ရှိလျှင် မိမိတို့ ရွာရှိ အိမ်ခြေ ဦးရေအတိုင်း ရသလောက်ကို ခွဲဝေ ယူကြရပါသည်။ ထိုသို့သော မြေနုများ ပေါ်ထွန်းလာခြင်း ၊ လက်ရှိမြေများပေါ်တွင် ဧရာဝတီမြစ်ရေ၏ ကောင်းမွန်းစွာ ဖြတ်သန်းစီးဆင်း လာခြင်းတို့ကြောင့် တင်ကျန်ရစ်သော နုန်းသားများသည် သဘာဝတရားကြီး၏ ဖန်တီးပေးမှု သဘာဝမြေသြဇာများဖြစ်သဖြင့် ထိုမြေသြဇာများကို အသုံးပြု၍ လုပ်ကိုင် စားသောက်နေကြရသည်မှာ ဧရာဝတီမြစ်ကြောင်းတစ်လျှောက်ရှိ ကျေးလက်နေပြည်သူတို့အတွက် စီးပွားရေး အဆင်ပြေ ချောမွေ့မှု ဖြစ်ကြရပါသည်။

ထိုသို့ စီးပွားရေး အဆင်ပြေစွာ နေထိုင်လာခဲ့ကြသော ကျွန်တော်တို့ မြစ်ဝကျွန်းပေါ်ရှိကျေးရွာများအားလုံး နီးပါးသည်.. ယခုအခါ သဘဝတရားကြီး၏ ဖောက်ပြန်မှုများ၊ လူသားတစ်ချို့တို့၏ အတ္တ၊ လောဘတို့ကြောင့် ဧရာဝတီမြစ်ကြီးသည် ကျန်းမာရေး စတင်ဖောက်ပြန်လာသည့် အတွက် မြစ်ဝကျွန်းပေါ်တွင် ဧရာဝတီမြစ်ကြီးကို အကြောင်းပြု၍ လုပ်ကိုင်စားသောက်ကြရသော ကျေးလက်နေ ပြည်သူတို့သည်လည်း စီးပွားရေး အဆင်မပြေမှုများမှာ တစ်နှစ်ထက် တစ်နှစ် ပိုမို ကျပ်တည်း လာနေကြပါသည်။ ဟိုးယခင်က ဆိုလျှင် ထိုကျွန်းပေါ်ရှိ ကျေးရွာ တို့သည် ဧရာဝတီမြစ်နှင့် အနီးကပ်ဆုံးမှာ တည်ရှိနေထိုင်ကြရသည့် အတွက် ကျေးရွာ တစ်ရွာလျှင် ရေတွင်း တစ်တွင်းလောက်ပဲ ရှိကြပါသည်။ ဧရာဝတီမြစ်အတွင်းမှ ရေများကိုသာ အလွယ်တကူ အသုံးပြုကြရပါသည်။ ဝါဆို၊ ဝါခေါင်ဆိုလျှင်လည်း ဧရာဝတီမြစ်ရေသည် ကျွန်းပေါ်ရှိ ကျေးရွာများ အားလုံးပေါ်သို့ မြစ်ရေများဖုံးလွမ်းသွားအောင် လျှံတက်သည့်အတွက် ဧရာဝတီမြစ်ရေကို အသုံးပြု၍ စိုက်ပျိုးရသော စပါးများသည်လည်း ဖြစ်ထွန်းအောင်မြင်စွာနဲ့ စိုက်ပျိုးနိုင်ခဲ့သည့်အပြင် ထိုသို့ မြစ်ရေလျံအောင် တက်ခဲ့သည့်အတွက် ကျွန်းပေါ်ရှိ လုပ်စားမြေများသည်လည်း နုန်းပို့မြေများနှင့်အတူ.. အစိုဓာတ်များ အမြဲရှိနေသည့်အတွက် မြေပဲနှင့် တခြား သီးနှံမျိုးစုံ စိုက်ပျိုးရာတွင်လည်း ဖြစ်ထွန်းအောင်မြင်မှုများ ဖြစ်ခဲ့ပါသည်။

သို့သော်….


ယခုအချိန်တွင် ဧရာဝတီမြစ်အထက်ပိုင်းရှိ တံတားတည်ဆောက်မှုများ၊ ရွှေလုပ်ငန်းလုပ်ကိုင်ကြသူများ၊ သဘာဝပတ်ဝန်းကျင်ကို ပျက်စီးစေနိုင်သည့် အလုပ်အကိုင်အမျိုးမျိုးတို့ကြောင့် ဧရာဝတီမြစ်ကြီးသည် ကျန်းမာရေး စတင် ချို့တည့်လာသည့် အတွက် သဲသောင်များ ပေါ်ထွန်းလာခြင်းတို့ကြောင့် ကျွန်တော်တို့ ကျေးရွာများအနီးတွင်လည်း နွေရာသီဆိုလျှင် မြစ်နှင့် အတော်ကြီးကို အလှမ်းကွာဝေးသွားကြရပါသည်။ ထို့ကြောင့် ကျေးရွာတိုင်းရှိ အိမ်တိုင်းလိုလိုတွင် လက်လှုပ်ဘုံဘိုင်ရေတွင်းများကို တူး၍ အသုံးနေကြရပါသည်။ ဒီ့ထက် ဆိုးသော အခြေအနေများမှာ ဧရာဝတီမြစ်ရေသည် ဝါဆို၊ ဝါခေါင်သို့ ရောက်လာသော်လည်း ကျွန်းများပေါ်သို့ မြစ်ရေ ဖုံးလွှမ်းခြင်း မရှိသည်မှာ သုံးလေးနှစ်သို့ပင် ရောက်ရှိလာခဲ့သည်။ ထို့ကြောင့် ဧရာဝတီမြစ်ကို အမှီပြု၍ လုပ်ကိုင်စားသောက်နေကြရသော ထိုကျေးရွာများရှိ တောင်သူများအားလုံးသည် တစ်နှစ်ထက် တစ်နှစ် စီးပွားရေး အဆင်မပြေမှုများ ဖြစ်နေရပါသည်။ ထိုနည်းတူစွာပင် ဧရာဝတီမြစ်ရိုးတစ်လျောက်ရှိ ကျေးရွာပေါင်း မြောက်များစွာတို့သည်လည်း ထိုသို့သော အခက်အခဲ များ ဖြစ်ကြရမည်မှာ သေချာသလောက် ရှိပါသည်။

ထိုသို့သော ကျေးလက်နေ ပြည်သူများ၊ တောင်သူဦးကြီးများ အားလုံးဆီမှ ကောက်ပဲသီးနှံနှင့် ဆန်၊ စပါးများ မဖြစ်ထွန်းသည့်အတွက် တောင်သူ ဦးကြီးများ စီးပွားရေး အဆင်မပြေဖြစ်ကြသလို မြို့နေပြည်သူများ အနေဖြင့်လည်း ဆန်၊စပါးနှင့် ကောက်ပဲသီးနှံများကို ဈေးကြီးပဲ၍ ဝယ်ယူစားသုံးရသဖြင့်… ပြည်သူတို့၏ စီးပွားရေးမှာ ပိုမို၍ အဆင်မပြေမှုများ ဖြစ်လာနိုင်ပါသည်။ ထိုသို့ဖြစ်ရသော အကြောင်းအရင်းများမှာ… သဘာဝတရားကြီးက ဖန်ဆင်းပေးလိုက်သော ကျွန်တော်တို့ရဲ့ ဧရာဝတီမြစ်ကြီး နှင့်တကွ သဘာဝပတ်ဝန်းကျင်ရှိ တောတောင်များ ပျက်သုန်းရခြင်းကြောင့် ဖြစ်ရသည်ဟု ထင်မြင်မိပါသည်။

ထို့ကြောင့် ဧရာဝတီမြစ်ကြီးသည် ကျွန်တော်တို့ မြစ်ရိုးတစ်လျောက်ရှိ ပြည်သူတို့၏ အသက်ပင်ဖြစ်သည်။ ထိုသို့ ဧရာဝတီဖြစ်ကြီးသည် ကျွန်တော်တို့၏ အသက်ဖြစ်သလို ကျွန်တော်တို့ တစ်မျိုးသားလုံး၏ အသက်လည်းဖြစ်ပါသည်။ ယခု အခါ ဧရာဝတီ မြစ်ကြီးကို ပိတ်၍ ဆည်တည်ဆောက်နေကြသောကြောင့် ဧရာဝတီမြစ်ကြီးသည် တစ်ချိန်ကျရင် ကွယ်ပျောက်သွားနိုင်သည်မှာ မလွဲမသွေဖြစ်နိုင်ပါသည်။ အဘယ့်ကြောင့်နည်း… ဆည်တည်ဆောက်မှုသည် ယခုမှ စတင်တည်ဆောက်ကာစပင်ဖြစ်လင့်ကလား ဧရာဝတီမြစ်၏ အခြေအနေသည် ယခင်ကနှင့် မတူ မြစ်ကြောင်းပြောင်းလဲ မှုများ စတင်ဖြစ်ပွားလာသည့် အပြင် မြစ်ရေ အခြေအနေမှာလည်း တစ်နှစ်ထက် တစ်နှစ် လျော့နည်း လာလျက်ရှိနေပါသည်။ ထို့ပြင် မြစ်အတွင်း သဲသောင်ပြင်များ ဖြစ်ထွန်းမှုမှာလည်း ပို၍ ပင် များပြားလာသည်ကို တွေ့မြင်နေရပါသည်။ တပိုတွဲ ၊ တပေါင်းလများတွင် ဧရာဝတီမြစ်အတွင်းသို့ ဖြတ်သန်းသွားလာဖူးသူများ တွေ့မြင်နေကြရပါမည်ဖြစ်ပါသည်။

ထို့ကြောင့် ကျွန်တော်တို့သည်လည်း တက်နိုင်သည့်ဘက်မှနေ၍ ဧရာဝတီမြစ်ကြီး ထာဝရ တည်မြဲ စီးဆင်း နေနိုင် စေရန်အတွက် ကြိုးပမ်း ဆောင်ရွက်ကြရပါမည်။

ဧရာဝတီဆိုသည်မှာ… ကျွန်တော်တို့၏ အသက်ဖြစ်သည်။

ဧရာဝတီဆိုသည်မှာ… ကျွန်တော်တို့ တိုင်းပြည်၏ အသက်ဖြစ်သည်။

ဧရာဝတီဆိုသည်မှာ… ကျွန်တော်တို့ တစ်မျိုးသားလုံး၏ အသက်ဖြစ်သည်။

ဧရာဝတီဆိုသည်မှာ… ကျွန်တော်တို့ တိုင်းရင်းသားအားလုံး၏ သွေးစည်းညီညွတ်မှုဖြစ်သည်။

ထို့ကြောင့် မြန်မာဆိုသော ကျွန်တော်တို့ လူမျိုးစုများ ပျောက်ကွယ်မသွားရအောင်… ဧရာဝတီမြစ်ကြီး ထာဝရ ရှင်သန် စီးဆင်းနိုင်အောင် ကျွန်တော်တို့ အားလုံးမှာတာဝန် ရှိတာကြောင့် ကျွန်တော်တို့အားလုံးကနေမှ ဧရာဝတီမြစ်ကြီးပေါ်တွင် တည်ဆောက်လျှက်ရှိနေသော မြစ်ဆုံ စီမံကိန်းကြီးကို ဆက်လက်ပြီး မလုပ်ဆောင်ဖို့ရန်အတွက် မြစ်ဆုံ စီမံကိန်း ကိစ္စကို ကန့်ကွက်ပါတယ် ဆိုတဲ့ အကြောင်း ဤနေရာကနေမှ ကျွန်တော်တို့ရဲ့ ဆန္ဒတွေကို ဘလော့ဂ်ဂါအားလုံးတို့နှင့် ထပ်တူ ထပ်မျှ ဖော်ထုတ်လိုက်ရပါတယ် ခင်ဗျား။

ကျွန်တော့်ရဲ့ ဧရာဝတီအကြောင်းကို ပထမဆုံး အကြိမ်ရေးထားတဲ့ ပထမအမေ ဧရာဝတီ ကိုလည်း ဒီနေရာလေးမှာ ဧရာဝတီမြစ်ရှု့ခင်း ပုံကလေးများနှင့်တကွ သွားဖတ်လို့ရပါတယ် ခင်ဗျာ။

ခင်မင်စွာဖြင့်...

ဇော်သိင်္ခ

Wednesday, September 21, 2011

သာသနာ့အောင်မြေ ဘုန်းကြီးကျောင်းအတွက် အလှူရှင်များစာရင်း

မကွေးတိုင်း၊ စလင်း-ဆင်ဖြူကျွန်းမြို့နယ်၊ ဆင်မကျွန်းကျေးရွာအုပ်စု၊ချင်းပြစ်ရွာမှ ဧရာဝတီမြစ်ကမ်းပါးပြိုမှုကြောင့် နေရာပြောင်းရွှေံ့ ပြန်လည်တည်ဆောက်ရန် အခက်တွေ့နေသောသာသာနာ့အောင်မြေဘုန်းကြီးကျောင်းအတွက် (၁၉၊ စက်တင်ဘာလ၊ ၂၀၁၁)အထိ လက်ခံရရှိပြီးသောအလှူရှင်များစာရင်းမှာ

မေတ္တာရှင်(ရွှေပြည်သာ) ဆရာတော် - ၁၀ သိန်း ၈ သောင်း

(ကာယကံမြောက်အလှူအဖြစ် မေတ္တာရှင်(ရွှေပြည်သာ) ဆရာတော်၏ ညွှန်ကြားချက်ဖြင့် မေတ္တာရှင် ဖောင်ဒေးရှင်းအဖွဲ့(စစ်ကိုင်း) နှင့် ကာယကံမေတ္တာရှင်အဖွဲ့(မန္တလေး)တို့မှ တာဝန်ရှိသူများ ကိုယ်တိုင် (၂၀.၈.၂၀၁၁) နေ့က ချင်းပြစ်ရွာသို့ သွားရောက် လှူဒါန်းခဲ့ပါသည်။)

ပုလဲဆရာတော် ဦးပညာဝံသ - ၂ သိန်း

ရွှေဆံနွယ်ဆရာတော် ဦးဝါယမာနန္ဒ - ၂ သိန်း

တောင်တန်းသာသနာပြုဆရာတော် ဦးတိက္ခ(မန္တလေး) - ၁ သိန်း

သီတဂူကြယ်တစ်ပွင့် ဦးပညာနန္ဒ - ၁ သိန်း

ဓမ္မဓရ၀ါဆိုကျောင်းတိုက်ဆရာတော် ဦးကုမာရ - ၁ သိန်း

ဦးဥာဏ်ဝင်း + ဒေါ်နန်းမြင့်မြင့်မေ(မန္တလေး) - ၅ သောင်း

ဒေါ်ခင်အေး (နောင်ပိုအောင်၊ ဟုမ္မလင်းမြို့နယ်) - ၁ သောင်း

စုစုပေါင်းလက်ခံရရှိသောအလှူငွေ (ကျပ်)ပေါင်း - ၁၈ သိန်း၊ လေးသောင်း ကျပ်တိတိ လက်ခံရရှိပါသည်။


6594608.jpg

ကာယကံမြောက်အလှူအဖြစ် မေတ္တာရှင်(ရွှေပြည်သာ) ဆရာတော်၏ ညွှန်ကြားချက်ဖြင့် မေတ္တာရှင် ဖောင်ဒေးရှင်းအဖွဲ့(စစ်ကိုင်း) နှင့် ကာယကံမေတ္တာရှင်အဖွဲ့(မန္တလေး) တို့မှ တာဝန်ရှိသူများ ကိုယ်တိုင် (၂၀.၈.၂၀၁၁) နေ့က ချင်းပြစ်ရွာသို့ သွားရောက် လှူဒါန်းခဲ့မှု မှတ်တမ်းများ


6594600.jpg

မန္တလေးမြို့၊ နိုင်ငံတော် ပရိယတ္တိ သာသနာ့ တက္ကသိုလ်၊ အဆောင်(၁၈)အဆောင်မှူး၊ မြန်မာစာဌာန (နည်းပြ) ဓမ္မဓရ အရှင် ၀ါယမာနန္ဒ က ချင်းပြစ်ရွာ၊ သာသနာ့အောင်မြေဘုန်းတော်ကြီးကျောင်း ပြန်လည်တည်ဆောက်ရေးအတွက် အလှူငွေ ကျပ် ၂ သိန်း လှူဒါန်းရာ ဆရာတော်ကိုယ်စား ဒေါက်တာထူးမြင့်ဆွေက အကျိုးတော်ဆောင် ကိုသန်းလင်းထံ (၁၃၊ စက်တင်ဘာ၊ ၂၀၁၁)နေ့က လှူဒါန်းပေးအပ်စဉ်

6594604.jpg

ဆရာတော် ဘဒ္ဒန္တ ဦးပညာဝံသ တည်ထောင်သော ပုလဲ ပရဟိတ ဖောင်ဒေးရှင်း(မန္တလေး)က
ချင်းပြစ်ရွာ၊ သာသနာ့အောင်မြေဘုန်းတော်ကြီးကျောင်း ပြန်လည်တည်ဆောက်ရေးအတွက် အလှူငွေ ကျပ် ၂ သိန်း ကို အကျိုးတော်ဆောင် ကိုသန်းလင်းထံ (၁၀၊ စက်တင်ဘာ၊ ၂၀၁၁)နေ့က လှူဒါန်းပေးအပ်စဉ်

---------------------------
ဆက်သွယ်လှူဒါန်းရန်

ဦးပညာဒီပ

ဖုန်း - ၀၉ ၄၃၀၂၆၃၈၉

သာသာနာ့အောင်မြေ ဘုန်းကြီးကျောင်း

ချင်းပြစ်ရွာ၊ ဆင်မကျွန်းကျေးရွာအုပ်စု၊ စလင်းမြို့နယ်၊ မင်းဘူးခရိုင်၊

မကွေးတိုင်း။

အကျိုးတော်ဆောင် ကိုသန်းလင်း

ဒေါက်တာထူးမြင့်ဆွေ

ဖုန်း - ၀၉ ၉၁၀၂၁၇၈၅

လက်ထောက်ဆရာဝန်၊ ကလေးဆေးရုံကြီး(အဟောင်း)၊ မန္တလေး။

ဦးကောဝိဒ kovida9@gmail.com (Ph: 092110202)

ကိုဇော်သိင်္ခင်္ zawtk07@gmail.com (Ph: 0991041540)

ခင်မင်စွာဖြင့်...
ဇော်သိင်္ခ




 
^ထိပ်ဆုံးသို့