မိုးကောင်းကင် အောက်သို့ ရောက်လာကြသူအားလုံး ကျန်းမာချမ်းသာစွာဖြင့် ရွှင်လန်းချမ်းမြေ့ကြပါစေကြောင်း ဆုမွန်ကောင်းတောင်း မေတ္တာပို့သလိုက်ပါတယ်။

Monday, August 16, 2010

အတ္တဥခွံ

အတ္တဆိုတာ ``အရွေ့`` တစ်မျိုးဖြစ်တယ်။
ဒါနဲ့ပတ်သက်လို့ ကျွန်တော်ကိုယ်တိုင်တွေ့ကြုံတဲ့ ဖြစ်ရပ်လေးပြောပြပါရစေ။ ဒီဖြစ်ရပ်ကြောင့် ကျွန်တော်ရဲ့ အတ္တစိတ်ကို ကျွန်တော်ပြန်ကြည့်တက်တဲ့ အလေ့အကျင့် ရလာခဲ့တယ်။ ဒီဖြစ်ရပ်ကြောင့် ကျွန်တော့်ရင်ထဲက အတ္တစိတ်ဆိုတဲ့ ``အကောင်`` ဥခွံထဲက ပေါက်ထွက်လာတာ သတိပြုမိတက်လာတယ်။
********
 လွန်ခဲ့တဲ့ ငါးနှစ်လောက်တုန်းကပေါ့။
နယ်မြို့လေးတစ်မြို့ကို ကျွန်တော် စာသွားသင်ဖြစ်တယ်။ အိမ်တစ်အိမ် မီးလောင်တာကို အစအဆုံး ကျွန်တော် မြင်တွေ့ခွင့်ရခဲ့တယ်။ အဲ့ဒီဖြစ်ရပ်ကိုစာဖွဲ့ပြပါရစေ။
အဲဒီအိမ်ဟာ မြို့ရဲ့အချက်အချာကျတဲ့နေရာမှာရှိတယ်။ မြေကွက်လပ်ကလည်း အကျယ်ကြီးပဲ။ တိုက်အိမ်ဆောက်ထားတာလည်း မကြာသေးဘူး။ ဒီမြို့မှာတော့ အဲဒီတိုက်အိမ်က အသားနားဆုံးပဲ။ အိမ်ပိုင်ရှင်မှာ သားသုံးယောက်နဲ့ သမီးတစ်ယောက်ရှိတယ်။ သားအကြီးဆုံးက အဲဒီအိမ်မှာပဲ ကျူရှင်ဖွင့်ထားတယ်။ ဓာတုဗေဒဘာသာရပ် အနီးကပ်ပို့ချပေးဖို့ ကျွန်တော့်ကိုဖိတ်ကြားလို့ ကျွန်တော်ရောက်သွားခဲ့တယ်။ ကျွန်တော်ရောက်တဲ့နေ့မှာပဲ အိမ်ပိုင်ရှင်အဖေကြီးက မန္တလေးမြို့ကို ဈေးဝယ်သွားထွက်သွားတယ်။
သူတို့နေတဲ့အိမ်ဟာ မြို့လယ်ဈေးနဲ့ မလှမ်းမကမ်းမှာရှိတော့ သောက်ရေသန့်ကုမ္မဏီတစ်ခုက အဲ့ဒီအိမ်ကို ဝယ်ချင်တယ်။ ပေါက်ဈေးထက် နှစ်ဆပေးတယ်။ အိမ်ပိုင်ရှင် အဖေကြီးက မရောင်းဘူး။ သားတွေက ရောင်းချင်တယ်။ သူ့အဖေက ခရီးမထွက်ခင်မှာ ပြောသွားတယ်။ ဒီအိမ်နဲ့မြေကို ပေါက်ဈေးထက်သုံးဆရရင် ရောင်းမယ်တဲ့။
ကျွန်တော်က အဲဒီ့မြို့မှာ သုံးညအိပ်ပြီး စာသင်ဖို့ ပြင်ဆင်လာတယ်။ ကျွန်တော်ရောက်ပြီး နှစ်ရက်အကြာမှာ အဲဒီအိမ်ကြီးမီးလောင်တော့တယ်။ ဖြစ်ချင်တော့အိမ်ပိုင်ရှင် အဖေကြီးက မန္တလေးက ခရီးရောက်မဆိုက် ပြန်လာတဲ့ အချိန်ဖြစ်နေတယ်။
နယ်မြို့လေးဆိုတော့ မီးလောင်တဲ့အခါ ရရာ ရေပုံးတွေနဲ့ ပက်ကြတယ်။ မီးကိုငြိမ်းသတ်ဖို့ကြိုးစားကြတယ်။ အိမ်ပိုင်ရှင်အဖေကြီးလည်း ပျာယာကိုခတ်လို့။ ကျွန်တော်လည်း တွေ့တဲ့ရေပုံးတစ်ပုံးကိုဆွဲပြီး မီးလောင်နေတဲ့အိမ်ကြီးကို ရေနဲ့ငြှိမ်းသတ်ပေးခဲ့ရတယ်။ ရေတွေလည်း ရွှဲလို့၊ ရွံ့တွေလည်း ပေပွလို့ပေ့ါ။
``ငါ့အိမ်မီးလောင်နေပြီ။ ငြိမ်းကြပါဟ၊ လုပ်ကြလေ။ ဘာလို့ ငါ့အိမ်မီးလောင်တာကို ဝိုင်းကြည့်နေကြတာတုန်း``
အဲဒီအချိန်မှာ ကျွန်တော်တွေးမိတယ်။ ဒီအိမ်ကိုသာ သူခရီးမထွက်ခင်က ရောင်းသွားခဲ့ရင် ဒီလို သောကမျိုး၊ ဒုက္ခမျိုးဖြစ်မှာ မဟုတ်ဘူး။ အခုတော့ သူ့အိမ်ကြီး မီးလောင်နေတာ သူ့ကိုလောင်နေသလိုပဲလို့ ကျွန်တော်ခံစားနေမိတယ်။ အဲဒီအချိန်မှာ သားအကြီးက သူ့အဖေနားကို ကပ်လာတယ်။
``အဖေ…. စိတ်မပူနဲ့အဖေ။ ဒီအိမ်ကိုပေါက်ဈေးထက် သုံးဆပေးမယ်လို့မနေ့ကပဲ ကျွန်တော် အရောင်းအဝယ်စာချုပ် ချုပ်ထားပြီးပြီ အဖေရ။ အဖေစိတ်ကို  အေးအေးထားပါ။ ဒါအဖေ့အိမ်မဟုတ်တော့ဘူး``
ချက်ချင်းဆိုသလိုပဲ။ ဒီလူကြီးရဲ့မျက်နှာမှာ သောကတွေပျောက်သွားတာ တွေ့လိုက်ရတယ်။ ရင်ထဲမှာ ပူလောင်မှုတွေ ငြိမ်းသွားတာ တွေ့ရတယ်။ မီးလောင်တာကို ဝိုင်းကြည့်နေတဲ့ လူတွေထဲကလူတစ်ယောက်လိုပဲ သူ့မျက်နှာဟာ ချက်ချင်းဖြစ်သွားတယ်။ ငါ့အိမ်ကို မီးလောင်နေတာ မဟုတ်ဘူးလို့ ခံစားချက်ချက်ချင်းဖြစ်သွားတယ်။
အဲဒီအချိန်မှာ ဒုတိယသားက သူ့အဖေကို ဝင်ပြောတယ်။
``အဖေရေ… အရောင်းအဝယ်စာချုပ်သာချုပ်ထားတာ။ စရန်ကလည်း နည်းနည်းလေးပဲ ပေးထားသေးတာ။ မဝယ်တော့ဘူးဆိုရင် ဘယ်လိုလုပ်မလဲ ။ ကျွန်တော့်အထင်တော့ စရံအဆုံးခံမယ်ထင်တယ်``
သားအလတ်ရဲ့စကားကိုလည်းကြားရော အဲ့ဒီ အဖေကြီးဟာ ချက်ချင်းပဲ ပျာယာခတ်သွားပြန်တယ်။ ငါ့အိမ်ကို မီးလောင်နေတယ်လို့ ခံစားသွားရပြန်တယ်။
``လုပ်ကြပါဟ… ငြှိမ်းကြပါဟ။ ဘာလို့ ဝိုင်းကြည့်နေကြတာလဲ။ ကူညီကြပါဦး။ ငါ့အိမ်ကြီး မီးလောင်နေပြီ။ ဝိုင်းကြပါ။ ပက်ကြပါ``
အဲဒီအချိန်မှာ တတိယသားက အဝေးကနေပြီး သူ့အဖေဆီကို ပြေးလာတယ်။ ပြီးတော့ သူ့ဖေကို ဒီလိုပြောတယ်။
``အဖေရေ… အဲဒီကုမ္မဏီက မန်နေဂျာနဲ့ သားနဲ့ကသူငယ်ချင်း။ အခုလေးတင် အဲဒီမန်နေဂျာနဲ့တွေ့ခဲ့ပြီ။ သူ့ရဲ့ ``ဘော့စ်`` ဆီကို ဖုန်းဆက်တယ်တဲ့ သူ့ရဲ့ ``ဘော့စ်``က ပြန်ပြောတယ်။ အိမ်မီးလောင်တာ မြေ မီးလောင်တာမှ မဟုတ်ဘူး။ ဝယ်မယ်လို့ဆုံးဖြတ်ထားတဲ့ကိစ္စ။ ဝယ်မယ်တဲ့။ အဲ့ဒီမြေပေါ်မှာ အဆောက်အအုံအသစ် ပြန်ဆောက်မယ်လို့ပြောတယ် အဖေ``
``မင်းဟာက သေချာရဲ့လားကွ``
``သေချာပါတယ်အဖေရ၊ သား အခုလေးတင် မန်နေဂျာနဲ့စကားပြောလာတာ။ သားရှေ့မှာတင် သူဖုန်းဆက်ပြီး မေးတာ။ အဖေ စိတ်အေးအေးထားပါဗျာ``
အဲဒီအချိန်မှာအိမ်ကြီးက မီးတော်တော်ကျွမ်းနေပါပြီ။ အိမ်နောက်ပိုင်းတစ်ပိုင်းလုံး မရှိတော့ဘူး။ ဘာပစ္စည်းမှလည်း မသယ်ဖြစ်ကြဘူး။ သားငယ်ရဲ့စကားကိုလည်းကြားရော သူ့အဖေဟာ မျက်ရည်တွေကို သုတ်လိုက်တယ်။ ပုဆိုးကို ပြင်ဝတ်လိုက်တယ်။ မြေကြီးပေါ်ကို ထိုင်ချလိုက်တယ်။ သူများအိမ် မီးလောင်နေသလို အကြည့်မျိုးနဲ့ အေးဆေးသက်သာစွာပဲ သက်ပြင်းချလိုက်ပါတယ်။
``တော်ပါသေးရဲ့။ ဒီလို…. ကတိတည်တဲ့သူနဲ့ တွေ့ရတာ အဖေတော့ ကံကောင်းတာပဲ``
မီးလောင်နေတဲ့အိမ်ကြီးကို သားအဖတွေ ထိုင်ပြီးကြည့်နေကြတယ်။ ကိုယ့်အိမ်မဟုတ်ဘူးဆိုတဲ့အသိကြောင့် ရင်ထဲမှာအေးသွားတယ်။ လူတွေကလည်း ဘာမှမတက်နိုင်တော့ မီးသူ့ဘာသာသူ ငြိမ်းမယ့်အချိန်ကိုပဲ စောင့်ကြည့်နေသလိုဖြစ်နေတယ်။ ဒီလိုနဲ့ အိမ်ကြီးဟာ ပြာပုံဖြစ်ခါနီးနေပြီ။ အဲဒီအချိန်မှာ အငယ်ဆုံး သမီးက ငိုပြီးတော့ သူတို့ရှိရာကိုပြေးလာတယ်။
``အဖေရေ… ဒီအိမ်ကြီးကို ဝယ်လက်က စရန် အဆုံးခံမယ်တဲ့``
သားအငယ်ကဝင်ပြောတယ်။
``နင်ကလည်း မဟုတ်တာ။ ငါအခုလေးတင် မန်နေဂျာနဲ့တွေ့ခဲ့တာ သူ့ရဲ့ ဘော့စ်က မြေကို မီးလောင်တာမဟုတ်ဘူးတဲ့။ ပေးထားတဲ့ ကတိအတိုင်းဝယ်မယ်တဲ့။ ငါနားနဲ့ ဆတ်ဆတ်ကြားခဲ့ရတာ``
အဲဒီအချိန်မှာ သူတို့အဖေဟာ သွေးတိုးသလိုလို ဖြစ်လာတယ်။ မောသလိုလိုဖြစ်လာတယ်။
``အငယ်မ နင်ဘာတွေလာပြောနေတာလဲ၊ အဖေ့ကို သေချာရှင်းပြစမ်း။ ငါသေလိမ့်မယ်။ အကြီးကောင်က တစ်မျိုး၊ အလတ်ကောင်က တစ်မျိုး၊ အငယ်ကောင်က တစ်မျိုး၊ နင်ကတစ်မျိုးနဲ့``
``ဟုတ်တယ်အဖေရ၊ သမီးရှေ့မှာ မန်နေဂျာဆီ ဖုန်းထပ်လာတယ်။ ဒီတစ်ခါဖုန်းဆက်တာကတော့ ဘော့စ်ရဲ့ မိန်းမကဆက်တာတဲ့။ ဒီလို မီးလောင်မှတော့ ဘယ်လိုလုပ်ပြီး ``လာဘ်`` ရှိမှာလဲတဲ့။ ဒီလို အတိတ်နမိတ်မကောင်းတဲ့ မြေကို မဝယ်ရဘူးတဲ့။ စရန်ကို အဆုံးခံမယ်တဲ့ အဖေရ``
သမီးစကားလည်း ဆုံးရော…. အဲဒီအဖေကြီးက သတိမေ့သွားပါတော့တယ်။
*******
အတ္တစိတ်ဟာ ကြောက်စရာကောင်းလိုက်တာ။
မီးလောင်တဲ့ဖြစ်ရပ်က အတူတူပဲ။
ငါ့အိမ်ဆိုတဲ့ စိတ်ပူးကပ်နေချိန်မှာ အတ္တဟာ ဥခွံထဲက ဖောက်ထွက်လာပါတော့တယ်။
ငါ့အိမ်မဟုတ်တော့ဘူးဆိုတဲ့ အသိစိတ် ဖြစ်သွားချိန်မှာ အတ္တဟာ ဥခွံထဲမှာငုပ်လျှိုးပြီးနေပြန်တယ်။
ကျွန်တော် စိတ်ထဲမှာ အဲဒီဖြစ်ရပ်ကိုကြည့်ပြီး အတ္တစိတ်ရဲ့ ရွေ့လျားမှုတွေကို အတိုင်းသားမြင်တွေ့လိုက်ရတယ်။
ငါ့ဟာ…. ငါ့ဥစ္စာ… ငါ့ပစ္စည်း…
ငါ့မြေ… ငါ့သား… ငါ့မယား…
ငါ.. ငါ… ငါ.. ဆိုတဲ့ အတ္တစိတ်ဟာ ကျွန်တော်တို့ကို သံသရာ တစ်လျှောက်လုံး ဒုက္ခပေးနေတာ။ ပူလောင်မှေုတွေပေးနေတာကို အတိုင်းသား မြင်လိုက်ရပါတော့တယ်။
အတ္တစိတ်ဆိုတဲ့ ``အကောင်`` ဥခွံထဲက ပေါက်ထွက်လာတာကို သတိနဲ့ ဉာဏ်နဲ့ ကြည့်ကြရအောင်ဗျာ….။

ဦးဘုန်း(ဓာတု) ၏ ``တွင်း`` ဆိုသော စာအုပ်မှ ခေါင်းစဉ်လေးများကို အွန်လိုင်းပေါ်မှ စာဖတ်ပရိသတ်များအတွက် ပြန်လည် မျှဝေ ပေးလိုက်ခြင်း ဖြစ်ပါတယ်။


ခင်မင်စွာဖြင့်...
ဇော်သိင်္ခ

4 comments:

SHWE ZIN U said...

တော်တော် တရားရစရာ ကိုယ်တွေ့လေးကို ဖတ်သွားတယ်

ခင်မင်စွာဖြင့်
ရွှေစင်ဦး

ချော(အစိမ်းရောင်လွင်ပြင်) said...

တကယ့်ကို လူတွေရဲ့ အတ္တကို ထင်ထင်ရှားရှား တွေ့လိုက်ရတယ်..
ကိုယ်တိုင်ဆိုရင်တော့လည်း ဒီလိုဘဲ ဖြစ်မယ်ထင်ပါတယ်.. လူဆိုမှတော့ အတ္တရဲ့ ဥခွံထဲက သူသူကိုယ်ကိုယ် ရုန်းထွက်ဖို့ ခက်လှပါတယ်.. သူတစ်ပါးကို ကြည့်တဲ့အခါ မှားနေတာတွေကို လွယ်လွယ်နဲ့ မြင်နိုင်ပေမဲ့ ကိုယ့်ကိုယ်ကို ပြန်ကြည့်တဲ့အခါ အမှားတွေကို မြင်ဖို့ ခက်လှပါတယ်.. ဘာလို့ဆို အဲဒီအတ္တရဲ့ ဥခွံက ဖုံးလွှမ်းထားတာကိုး....

ခိုင်နုငယ် said...

ှုငါ အစွဲတွေ မပြုတ်သ၍တော့
အတ္တတွေကလည်း ရှင်သန်နေကြအုံးမှာပါပဲ။
ကိုဇော်သိင်္ခရေ..


ခင်မင်စွာဖြင့်
ခိုင်နုငယ်

သဒ္ဓါလှိုင်း said...

`ငါ´ဆိုတဲ့အတ္တဟာသိပ်ကြောက်စရာကောင်းတယ်နော်..
ကိုယ်တိုင်လည်း သတိနဲ့ဆင်ခြင်နေထိုင်ဖို့ကြိုးစား
နေရတယ်..

ခင်မင်စွာ
သဒ္ဓါ

 
^ထိပ်ဆုံးသို့